進攻小一：家長面試騎呢大作戰

直資、私立小一面試正進行得如火如荼，孩子表現固然是評分重點，較易被忽略的其實是家長的態度。我的建議是：「家長表現突出加分有限，但家長一句失言、一個眼神、一個動作，甚至一個表情，可以連累孩子落空。」近日到訪多間直資小學，校長們分享以下「騎呢」而真實的家長面試個案，用來提醒家長——學校選孩子，更選家長。

學校選孩子 更選家長
個案一：當小朋友在超級市場拿了零食但沒付錢，應怎樣處理？家長回答：「細路係咁架啦。」校長暗忖﹕「我們學校嘅細路唔係咁。」
校長短評：情况等同小朋友難免有時會拿錯同學的文具，但會否當作理所當然，據為己有，或已明白不問自取，視為賊也的道理呢？

個案二：校長問：「你點樣培養孩子去閱讀？你最近有無睇緊咩書？」家長答：「我好鍾意閱讀，最近有睇《壹周刊》。」
校長短評：「睇雜誌，嚴格而言都算閱讀……吧。希望家長不會將《壹周刊》變成親子牀頭故事。」

請放手 請收口
個案三：校長問小朋友：「你平日有什麼興趣？」媽媽搶答：「阿仔平日好乖，鍾意音樂、畫畫，一得閒就拎起本書。」小朋友點頭。校長又問小朋友：「你最鍾意咩書呀？」父親搶答：「佢最鍾意睇恐龍書，隻隻恐龍都識哂。」校長再問小朋友：「知唔知今日來做乜呀？」父母一齊答：「面試囉。」
校長短評﹕「家長，請放手，請收口。」

個案四：家長踏入校長室，坐下，打招呼前急着說﹕「我本身係律師，對教育小朋友好有心得，本身對語言十分有天分，我個小朋友都識中、英、日語、普通話，音樂也學習多年，N級鋼琴……」
校長短評：「咁叻，唔使入嚟讀書啦！」家長切忌鋒芒太露，即勿Show off。

 家長切忌鋒芒太露
校長閱孩無數，觀察小朋友，大概知道父母或孩子身邊的人怎樣，例如：你對身邊人呼呼喝喝，孩子猶如一面鏡子反映。然後，面試短短時間，家長由踏入面試室開始，站立、步行的姿勢，坐下之後雙腳如何擺放或有否「印腳」，談吐、說話用字等等，家長失禮、孩子失分。
家長面試與孩子一樣，既要準備，也可說不用準備，因為平日你怎樣管教、身教，終究難逃校長、老師的法眼。

作者簡介：明報前教育新聞組長，育有一子一女，從新聞前線真正跳入教育大洪流